Kismaayo- Madaxweynaha Dowlad Goboleedka Jubbaland ee Soomaaliya Mudane Axmed Maxamed Islaam (Madoobe) ayaa qaabilay dhexdhexaadin ay dowladda Kenya usoo dirtay Madaxweynaha Soomaaliya Xasan Sheekh Maxamuud, si ay uga shaqeeyaan xal u helida khilaafka u dhaxeeya. Dowladda Federaalka Soomaaliya iyo Dowlad Goboleedka Jubbaland.
Qoraal kooban oo lagu daabacay Bogga Facebook-ga ee Madaxtooyada Jubaland, oo muujinayey soo dhaweynta Madaxweyne Madoobe ee wafdiga aan kor kusoo xusnay, ayaa lagu sheegay in Xoghayihii hore ee fulinta IGAD Danjire Maxbuub Macallin uu madax u yahay wafdiga Kenya oo uu sidoo kale ka mid yahay wakiilkii hore ee Kenya ee IGAD, Maxamed Cabdi. Afi, iyo Senator-kii hore ee gobolka “Wajeer” ee Waqooyi Bari Kenya Abdul Rahman Alo.
War saxaafadeedka laguma sheegin waxyaabaha ay ka wada hadleen wafdiga Kenya iyo madaxweynaha Jubaland Axmed Madoobe, balse socdaalka ay ku tageen magaalada Kismaayo ayaa ku soo beegmaya iyadoo uu sii xoogeysanayo khilaafka u dhaxeeya dowladda Soomaaliya iyo maamulka Jubaland, kaasoo sababay inay is casilaan labo wasiir oo ka tirsan dowladda Federaalka. oo ka soo jeeda Jubaland ayaa sidoo kale casumaad u fidisay wakiilada dowlad goboleedyada ee ku jira baarlamaanka federaalka Soomaaliya si ay uga qeyb galaan shirka ka dhacaya magaalada Kismaayo ee looga tashanayo xaalada siyaasadeed ee dalka.
Shabakadda Caasimada Online ayaa tilmaamtay in Guddoomiyaha Baarlamaanka Sheekh Aadan Madoobe uu u diiday ergadii laga soo doortay Jubaland inay tagaan magaalada Kismaayo, kadib markii ay ka codsadeen inuu u safro kulan uu la qaatay Isniintii, waxaana uu ku micneeyay. Baarlamaanka Federaalka ayaa waxaa horyaala shaqo muhiim ah oo ay tahay in ay ka qeyb qaataan, waxa ayna Shabakadu intaa ku dartay in Madaxweynaha Golaha Shacabka uu amar ku siiyay maamulka garoonka diyaaradaha Muqdisho in wakiilada aan kor kusoo xusnay aysan safrin.
Khilaafka u dhaxeeya dowladda Soomaaliya iyo maamulka Jubaland ayaa soo shaac baxay markii madaxweynaha maamulkaasi Axmed Madoobe uu bishii October ee lasoo dhaafay ka baxay shirarkii golaha wadatashiga Qaranka, maadaama uu ku gacan seyray qorshaha dowladda federaalka ee ku aadan doorashooyinka heer federaal iyo heer maamul goboleed, khilaafku wuu sii xoogaysanayay ilaa waagaas.
